கவிதை போட்டி 2021_5

கொரானா இரண்டாம் அலை. கொரானா என்றால் என்ன என்று தெரிவதற்குள் வந்தது இரண்டாம் அலை மக்கள் அரசு சொன்னதை ஏன் கடைபிடிக்க மறுக்க வேண்டும் என்பது புரியாத புதிர் அபராதம் என்றால் கோபப்படும் மக்கள் முகமூடி அணிய தயக்கம் காட்டியதின் விளைவே இரண்டாம் அலை மக்களின் விழிப்புணர்வு எப்போது மாறும் என்று தெரியவில்லை

2.அன்னையர் தினம்
அவள் மனவலிமையை எடை போடும் படிகற்கள் அவர்கள் என்பதால் அவர்களைப்பற்றி சொல்லியாக வேண்டிய கட்டாயம் … அனல் பறக்க வறண்டு வரும் காற்று
வியர்வை வட்டத்தில் ஒளியாய் விழும் சூரியன் நெருநெருவென முகத்தில் ஒட்டிய புழுதி கால்நடையாய் பாதை உணர்வு இல்லாமல் சிந்தைக்குள் ஒலிப்பது என்னவாக இருக்கும்.பொறுப்பற்று சுற்றித்திரியும் இரண்டு மகன்களை பற்றிய கவலைகள் ஒருபுறமிருக்க உழைப்பிற்கேற்ற கூலியில்லாது கையாளும் தன்மையற்று கஷ்டப்படும் கணவன் பற்றிய கவலைகள் மறுபுறமழுத்த கல்யாண வயதில் இருக்கும் பெண் பற்றிய பெருஞ்சுமைகளுக்கு மத்தியில் தலையில் இருக்கும் பழக்கூடையின் பாரம் என்ன பெரிதான சுமைகளை தந்து விடும்.

#கொரோனா_இரண்டாம்_அலை!

முதல் அலையைத் தலைமுழுகி எழுந்தோம்!
மூச்சுவிட்டோம்! அடுத்த அலை ஆரம்பிக்க அயர்ந்தோம்!
சுனாமியாய் எழுந்த அலை சுருட்டியது உயிரை!
இந்தியாவின் சாபமோ
கும்பமேளாவில் குளித்தது!
தேர்தல் தேரை இழுத்து வந்து
நடுத்தெருவில் நிறுத்தியது!
திருவிழா என்றால் ஓடிவரும் திரைகடல் கூட்டமோ
தடுப்பூசி என்றதும் திடுக்கிட்டு நின்றது!
ஆக்சிஜன் இல்லாமல் தில்லி அலறத் துவங்கியது!
பிணக்கூட்டம் எரித்த புகைமூட்டத்தைச் சுவாசித்தது!
மரண ஓலம் இமயத்தின் மடியெங்கும் ஒலித்தது!
வாழவும் வழியில்லை எரிக்கவும் இடமில்லை
படுக்கை எங்கே? ஊசி எங்கே?
கைகளை நீட்டிக் கதறுது இந்தியா!
என்று தீருமோ இந்தத் துயரம்!
ஆக்சிஜன் அற்றுப்போய் கொரானா
மூச்சுத்திணறி மடியாதா!
ஆதிசக்தி தாயே!
அருள்புரிந்து எமைக் காப்பாயே!
தேடியுனைச் சரணடைந்தோம்
எங்கள் தேசத்தைக் காப்பாயே!

அன்னையர் தினம்

அன்பில் கலந்த உயிரான உறவு !
அடிமனதில் ஏக்கம் கொண்டு !
ஆயிரம் கனவுகள் மெய்ப்பட்டு பலன்
அளித்திடுமே !
சந்தோச சாரலில் மிதக்கும் வாழ்வு !
ஆர்பரிக்க்கும் எண்ணத்தின் விடியலோ!
உறுதி செய்த பின்பு தன்னை
ஊக்கம் படுத்திய விடிவெள்ளியே !
மாதம் கடந்து செல்ல செல்ல
மகிழ்ச்சியில் அரவணைத்திடுவாள்!
தன்னுள்…
கண்ணில் பட்ட பாசம் எல்லாம் !
கனவின் வழியாய் மனதை! ஆர்ப்பரிக்கின்றதே …
பெற்றெடுக்கும் நாளில் தான் !
பட்டபாடு பெரும் துயரத்தின் வேதனை
முதல் அழுகுரலிடம் சரணடையுமே !
தன் கவலைகளை மறந்து குழந்தையை
புன்னகை சிந்தும் விதத்தில் ஆனந்த படும் மனமே !
தவமாய் தவமிருந்து கிடைத்த வரம் !
காணகிடைக்கும் போது பேரின்பம் !
சொல்ல துடிக்கும் வார்த்தைகள் !
சந்தோசத்தின் உச்சியில் உற்சாகமாக
சிறகடிக்கின்றது !
வளர்ச்சியின் போது கண்ட கனவுகள் !
வளமான எதிர்காலம் நோக்கி பயணம்
செய்யும் !
பார்த்து பார்த்து பாசம் காட்டும் !
அன்பில் கலந்த அன்னையே !
என்றென்றும் உன் அன்புடன் தமிழகமே….!
ஆனந்தமான தருணத்தில் அன்பின் பயணியாய்!
அன்னையர் தினத்தில் பாசத்தை
பகிர்ந்திடுவோம்!

வேல்…

திருக்குறள் பற்றி ஒரு கவிதை :

அகர முதல் எழுத்தில் ஆரம்பித்து !

ஆதி பகவன் வழியில் வித்தாய் விதைத்து !

இரண்டடிகளில் குறளை எளிய நடையில் எடுத்து உரைத்து !

ஈரடி வெண்பாக்களை கல்வியில் சிதைத்து கற்பியலில் வழிநடத்தி !

உலக பொது மறையில் சிறந்த குறளாக சிற்றம் பதிந்து !

ஊரார் போற்றும் பாடப்புகழோடு திகழ்ந்து !

எழுத்தாணியின் மூலம் வரிகளை தொகுத்து !

ஏற்றத்தின் பெருமையை உன் அடியில் கண்டோம் விளக்கத்தின் பொருட்டாக !

ஐயத்தை துறந்த உந்தன் ஒளி எனும் ஒழியியல் படைப்புகளோடு !

ஒற்றுமையை புகட்டும் குறளின் வலிமையோடு !

ஓசையின் நிமித்தம் அடிச் சீர் எனும் புகழின் கொடை வள்ளலாய் !

ஔ என்ற வார்த்தை உணர்த்தும் உன் எழுத்து வரிகளோடு…!!!

திகட்டப்படாத வரிகளின் தேன் கலந்த
மொழியில் !

தன்னிகரற்ற குறளின் வாழ்வியல் !

மொழிகளை துறந்த பொதுவியல்

ஒட்டு மொத்த தமிழ் குறளின் வளமையை உணர்த்த !

ஓங்க செய்து ! வாழ்க்கை எனும் அத்தியாயத்தை புகட்டும் ஒரே நூலியல்…!

அஃதே திருக்குறளின் படைப்பு …!!!

* தாய் அன்புக்கு ஈடாகும் உணர்வின் பந்தத்தோடு *

* தமிழ் தாய் மொழிக்கு இந்திய பாரத நாடு !
இணைப்பின் பிணைப்புகளோடும் !
திருக்குறளின் அரும்புகழோடும் …!

வேல்…

கருவறைப் பெட்டகத்தில்
பத்திரமாக பாதுகாத்து
பக்குவமாய் பத்தியமிருந்து
என்னைப் பெற்றெடுத்தவளே!

உணவிற்கு உதிரப்பாலையும்
உறக்கத்திற்கு உன் நெஞ்ச
மஞ்சத்தையும் கொடுத்து
வளர்த்தவளே!

நிழலாய் இருந்து ,இமைகள்
கண்களை காப்பது போல்
காத்தவளே!

நான் தாயானபோது உணர்ந்தேன்
தாய்மையின் உன்னதத்தை….
அர்த்தங்களுக்கு அடங்காத
அகராதியை…
இறைவனுக்கே இணையில்லாத
வார்த்தையை….

அன்னையர்கள்தினமும்
உதித்துக்கொண்டேதான்
இருக்கிறார்கள்
கண்ணனின் யசோதைகளாய்
ராமனின் கோசலைகளாய்!
_______________________________
தினம் தினம் அன்னையர் தின வாழ்த்துக்கள்!🌹🌹🌹

இயற்கை தாயே இரக்கம் கொள் …

கொத்துகொத்தா போகுதம்மா
எம்மக்க கொரோனாவில் சாகுதம்மா
காப்பாத்த யாருமில்ல
கண்ணெல்லாம் கலங்குதம்மா …
இன்னுமா இரக்கம் வரல
இயற்கை தாயே இன்கரம் நீட்டி
எம்மை இயல்புக்கு திருப்பம்மா …

எப்போதான் தீருமம்மா
எங்க வாழ்க்கை மாறுமம்மா
எல்லாம் போன பின்னே
எங்க உசுரு மட்டும் எதுக்கு சும்மா …

எட்டி எட்டி பாத்த மக்க
எட்ட நின்னு பாத்த மக்க
யாரையும் காணலையே
கதறி அழுவும் மக்க
கல்லாகி போகும் முன்னே
கைகொடுத்து காப்பாத்த வாருமம்மா…

எல்லாம் தப்புனாலும்
தண்டிப்பு தாங்கலம்மா
தருதலையா திருஞ்சிபுட்டோம்
தப்பத்தான் உணர்ந்துபுட்டோம்
தாயே நீ மனசு வைச்சா
தப்பிச்சிடும் எங்க மக்கா …

கொத்துகொத்தா போகுதம்மா
எம்மக்க கொரோனாவில் சாகுதம்மா
காப்பாத்த யாருமில்ல
கண்ணெல்லாம் கலங்குதம்மா …
இன்னுமா இரக்கம் வரல
இயற்கை தாயே இன்கரம் நீட்டி
எம்மை இயல்புக்கு திருப்பம்மா …

கட்சி கூட்டமுன்னு
களிப்பா கண்டபடி திரிஞ்ச மக்க
காத்து கிடைக்காம கண்மூடி
கிடக்குதம்மா …
கூட்டத்துக்கு கூப்பிட்டவன்
கூலி காசுக்கு கத்தினவன்
ஒருத்தனையும் காணலியே
காப்பாத்த ஆளின்றி
கதறி கிடக்குதே எம்மக்கா …

கையத்தான் கழுவலியே
கட்டுப்பாட மதிக்கலியே
கொழுப்பா திரிஞ்ச மக்க
குலநாசம் ஆகிடுச்சே …

வாய மூடாம , வம்பு பேசி திரிஞ்ச மக்க
வந்தா பாத்துக்கலாம் என
வாய்ச்சவடால் விட்ட மக்க
வாய்க்கரிசிக்கு வக்கில்லாம
வாசலிலே வைக்காம
வாழ்க்கை தொலைச்சி போகுதம்மா …

வந்துநின்னு காப்பாத்தம்மா
கொலைகார பாவி கொரோனாவ
கொன்னுபோட்டு கொஞ்சம்நஞ்சம்
மிச்சம் உள்ள குலம் காக்க வாருமம்மா …
தாயே நீ மனசு வச்சா மாறுமம்மா
இந்த மனுசகுலம் மீளுமம்மா…

கொத்துகொத்தா போகுதம்மா
எம்மக்க கொரோனாவில் சாகுதம்மா
காப்பாத்த யாருமில்ல
கண்ணெல்லாம் கலங்குதம்மா …
இன்னுமா இரக்கம் வரல
இயற்கை தாயே இன்கரம் நீட்டி
எம்மை இயல்புக்கு திருப்பம்மா ….

என்னில் முதல் கவிதை ..
நான் எழுதும் கவிதையை
என்னை எழுதிய அன்னைக்கு சமர்ப்பிக்கிறேன்.

ஒப்பீட்டளவில் கடலும் சிறுத்ததம்மா
உன் முன்னே!!

ஆகட்டும்.
கற்பனை குதிரையை பறக்க விட்டாலும்
அதன் கைப்பிடி என்னவோ
உன் நினைவில்.

உனை தாண்டி நான் யார்,
உன்னிலும் மேலானதை தேட.

கடலும் சிறுக்க தானே செய்யும்
உன் முன்.

நவீன
அறிவியலால் கூட அசைக்க முடியா
சிற்பம் நீ.

கேள்விகளாலே சுருக்க முடியா உன்னை
எதை கொண்டு நிரப்புவேன்.

அன்னை இருக்குமளவும்
அன்னையர் தினம் தான்.

பெற்றவள் மட்டுமே அன்னை அல்லவே,
பெண்மையே அன்னை தான்..

கொரோனா இரண்டாம் அலை
🌊🌊🌊🌊🌊🌊🌊🌊🌊🌊🌊🌊🌊🌊

ஆட்டோக்கள் எல்லாம்

அவசர ஊர்திகளாக மாறி

அணிவகுத்து நிற்கின்றன….

மருத்துவமனைகளில்

படுக்கை பற்றாக்குறையாம்….

அவசர ஊர்திகள் அனைத்தும்

அமரர் ஊர்திகளாக

அணிவகுத்து நிற்கின்றன….

மாயானத்தில் கூட

படுக்கை பற்றாக்குறையாம்….

🌊🌊🌊🌊🌊🌊🌊🌊🌊🌊🌊🌊🌊

கடற்கரையில், கடல் அலையில்

காற்று வாங்கினோம்

உல்லாசமாக…..

இன்றும்

காற்றைத்தான் வாங்குகிறோம் !!!

கொரோனா இரண்டாம் அலையில்

உயிருக்காக…..

🌊🌊🌊🌊🌊🌊🌊🌊🌊🌊🌊🌊🌊🌊🌊

திருமணங்கள் எல்லாம்

சொர்கத்தில் நிச்சயிக்கப்படுகின்றனவாம்….

போகும் போக்கைப்பார்த்தால்

இங்கு நிச்சயிக்கப்பட்ட

திருமணங்களே சொர்கத்தில் தான்

நடக்குமோ என்னவோ???

கொலைகார கொரோனாவால்…

🌊🌊🌊🌊🌊🌊🌊🌊🌊🌊🌊🌊🌊🌊🌊

-லோகநாயகி

எழுதாத தேர்வு !
உறக்கம் தொலைத்து
உணர்வுகளைக் குவித்து
பல நாட்கள் படித்துப்
பரிசாய்ப் பெறுவதே பட்டம்.
அன்று
தேர்வு எழுதாமலேயே
தேர்ச்சி என்பது கானல் நீர் !
ஒவ்வொரு முறையும் இன்று தேர்வென்பது
தொடுவானம் போல் ஆனாலும்
எழுதாத தேர்விற்கு தவறாது
எல்லோர்க்கும் பெய்து விடுகிறது
தேர்ச்சி மழை !
இணையக்கல்வியில் இதயங்களை இயந்திரமாக்கி
தொலைநோக்குப் பார்வையோடு
தொடரும் இக்கல்விக்கு
தொலைந்து விடுமோ நம் பார்வை ?
தேடிக் கற்றல் போய்
“தேட “மட்டுமே செய்கின்ற இளையோர்களால்
கேள்வியும் நானே ;பதிலும் நானே என்று
கேலியாய்ப் பார்க்கிறது வலைத்தளம் .

கனவுகளில் நீந்துகின்ற
கரை தாண்டா எம் கன்னியர்க்கு
திருமணம் என்பது
ஏக்கங்களோடு காத்திருக்கும்
எழுதப்படாத தேர்வு !

பட்டங்கள் பல பெற்றிருந்தும் -பொது
சட்டங்கள் யாவும் அறிந்திருந்தும்
இலக்கு என்பது இவர்களுக்கு -விதி
விலக்காய்ப் போனதால்
வியர்வை நீரில் தினம் குளிப்பதையே
உயர்வாய் எண்ணும் மங்கையவளுக்கு
அடுக்களையிலிருந்து வெளியே வரவும்
எழுதப்பட வேண்டுமோ ஒரு தேர்வு ?

காரிகையிவள் கால் பதிக்காத் துறையில்லை – ஆற்றும்
கடமைக்கோ எல்லையே இல்லை ;
இருப்பினும்
ஆணுக்குப் பெண் நிகர் என
அடித்துச் சொல்லிட இவள்
எழுத மறந்தது எந்தத் தேர்வை ?

கண்ணுக்குத் தெரியா வைரஸின்
கண்ணாமூச்சி ஆட்டத்தில்
விடியல் எனும் தேர்வு இன்னும்
எழுதப்படாமலேயே இருக்கிறது
விடை அறியாது .

காற்றைவிடக் கடிது பரவும் தொற்றை
காலனிடம் அனுப்ப
மூலிகை மருத்துவமே இன்று நம்
முன் நிற்கும் ஒரு ஆயுதம் !
காலங்களை நிழலை வைத்தே
கணித்து விடவும்
தோகைமயிலே இவர்கள் வானிலைக்குத்
தோற்றுப் போய் விடவும்
எமனைக் கூட தைரியத்தால்
எட்டடி தள்ள வைக்கும் -நம்
முன்னோர்களிடமிருந்து
முழுவதுமாய்க் கற்றல் என்பது
எழுதப்படாத தேர்வாகவே என்றும்
ஏட்டினில் இருக்கும் !

அன்னையர் தினம்
ஈரைந்து மாதங்கள் தவக்கரு சுமந்த
கூரைவேயா இல்லில் அரணாய் நின்று
புரையொன்றை கடிந்து விளக்கி நானொளிர
அரை உயிராய் தானுருகும்மெழுகவள்…

உற்றதொரு துணையை இழந்த பின்பும
பெற்றதோர் பிள்ளையின் எதிர்காலம் எண்ணி
அற்றே கலங்காது அகங்காத்து தரங்குறையாமல்
பொற்றொத்து மங்காதுமிளிரும் மெய்மையவள்…
நடை பயிலும் நாட்களிலே நேர்ந்த
தடையொன்றால் தடுக்கி நான் விழுந்தால்
படை திரட்டி தரைப்போர் செய்து வெற்றி
நடையோடு திரும்பிடும் வீர மங்கையவள்…
அழுக்குடையோடு அரைவயிறு கூழுண்ட போதிலும்
அழுதொன்று கேட்டு நின்றால் அப்பொருள்
பொழுதுசாயும்முன் விழிகாட்டி மகிழ்வூட்டும்
தொழுகின்ற தெய்வ வம்சத்தின் வரமவள்…

விதி தந்திட்ட வினைகளைத் துமியாக்கி
அதிகாலை வேளையில் ஆகாரம் செய்வித்து
மதிமுகம் பெற்றிட கல்விச்சாலை அனுப்பி
சாதித்த காட்டிய சரித்திர நாயகியவள்…

பாரமென எண்ணும் தன்ம உணர்ந்தென்
தாரமவள் தருகின்ற இன்னல் மறைத்து
சாராப் பண்போடு என்னவமோங்க இக்கணம்
ஓரமாய் ஒதுங்கி வாழ்த்தும் தாய்மையவள்.

-விருதை சசி,விருதுநகர்

மே தினம்!!

விழி சுருங்க,
வியர்வை சொட்ட,
உடல் நடுங்க
உழைக்கும் உழைப்பாளிகளின்
கைகளைப் பார்…..
தினமும் தொழிலாளர் தினமே!!!!

நெற்றி வியர்வை
நிலத்தில் சிந்தும் போதே,
கவலைச் சொட்டும், சொட்டுகிறது….
விளைநிலத்தில்!!!
நெல் நெற்பயிராக வரும்வரை…..

விதை விதைக்கும் போதே,
தொழிலாளியின் பயத்தை,
எண்ணமாக மாற்ற
விதை பேசுகிறது…..
இவ்வாறு!!
உன் உலக மக்களின் பசிக்காக,
இப்போதே, பயிரிடப்பட்டுள்ளேன்….
கவலை கொள்ளாதே என!!!

விவசாயி விழிக்கிறான்…
மறுநாள்வேலைப்பொழுது,
விதை முளையிட்டு,
செடியாக முளைக்கிறது….

கதிர் பிடிக்க,
விவசாயியின் உழைப்போ,
மிக உன்னதமானது….
நீர் பாய்ச்சி, உரமிட்டு,
களை நீக்கி,
இன்னும் எத்தனை எத்தனையோ??
அனைத்தையும் சற்றும் அயராமல்
சமாளிப்பவனே உழைப்பாளி!!!
நம் விவசாயி!!!!

கதிர்பிடித்து,
அக்கதிர்முற்றி நிலமடந்தையை
வணங்குகிறது!!
காரணம், விதை முளையிட
உதவிய, அந்நிலத்தை
வணங்கியே!!!

விவசாயியின் மகிழ்ச்சி
மட்டில்லாதது!!!
பேசிய விதை,
விருட்சம் அளித்ததை எண்ணியும்….
உலக மக்களின் பசி பறந்தது,,
என அந்த எண்ணமுமே!!!

இவ்வாறு, நன்றியுள்ளவர்களே அனைவரும்;
இருந்தபோதிலும், உணவில்லாமல்,
எத்தனை உள்ளங்களோ??
ஆகவே, இருக்கும் உணவை
வீண் செய்பவர்கள் மட்டும்,,
ஒரு நெற்பயிரை பயிரிட,
ஓர் விவசாயியோ,
ஆயிரம் வியர்வை முத்துக்களை
விதைக்கிறான்….
என் எண்ணினால் போதுமானது!!!

அன்னையர் தினம்

ஆண்டுகள் பல கழிந்தாலும் அழிக்க முடியாத
வரலாற்றுக் கவிதை அம்மா!

இன்னோர் உயிரை தன்னுடலில் சுமந்து
உதிரத்தை பாலாக்கி ஊட்டியவளே
உனை உருவகிப்பதற்கு வார்த்தைகள் இல்லையம்மா
இந்த உலகத்திலே…..

உற்ற துணையில்லை உறக்கமோ தனிமையில்
என் அசைவுகளுக்கு அர்த்தம் கொடுத்து
எனை ஆளாக்கி பார்த்தவளே…

களவியால் என்னை கருவறையில் தாங்கினாள்
நொடிப்பொழுதும் மறவேனே
நீ எனக்காய் பட்ட
துன்பங்களை….

இனியொரு முறை நான் பிறந்திடுவேனானால்
உன் கருவறையை கடன் வாங்கி கடவுளுக்கு பரிசளிப்பேன்
கொஞ்சம் வாழ்ந்து பாருங்கள் சொர்க்கத்தில்
என்று……….

அம்மா
நீ எந்தன் அகராதி
என் இதயத்தின் சரிபாதி.

என் புன்னகையின் உதிரம் நீ
என் கண்அசைவின் காரணம் நீ!

என் வார்த்தைகளின் அகரமுதல நீ
என் வாழ்க்கையின் வேர்ச் சாரம் நீ

இறைவன் எனக்காய் தந்த
இனியவளே….
என் அகத்தின் ஆழத்தில் இருந்து இடுகிறேன்
ஒரு முத்தம்
:அம்மா ” என்ற வார்த்தையின்
இரண்டாம் எழுத்தின் மேல் ஒரு புள்ளியாய்….
இப்படிக்கு,
கல்பு.@கற்பகலட்சுமி மோகன்.

எழுதாத தேர்வு…

காலாண்டு தேர்வெழுத அரையாண்டு காத்திருந்தேன்…
முழுவாண்டே வந்துருச்சே எங்கபோயி முறையிடுவேன்!!!
கணினியில தேர்வெழுத யோசனைகள் வந்திருக்காம்…
– எனக்கோ,
நாம்புடிக்கும் பேனாதான் வாக்கியத்த வரவழைக்கும்!!!
இந்தமுற தேர்ச்சிபெற்றா எருமமேய்க்க வரவேணாம்…
– அப்பா சொன்னது…
ஆனால் எழுதாத தேர்வுல தேர்ச்சிபெற்றா,
ஆயுசுக்கும் எரும பேச்சதான் கேட்கணுமோ!!!
முந்தாநாள் படிச்சதெல்லாம் மூளையில நிக்கலையே!!!
நடப்பாண்டு பாடத்தோட போனாண்ட சேத்துவெச்சு,
நித்தம்நித்தம் என்னால பாதுகாக்க முடியலயே!!!

பட்டணத்து பிள்ளையெல்லாம் பகுமானமா படிக்கிறாங்க…
பட்டிக்காட்டு பிள்ளையோநான் பாடுபட்டு படிக்கிறேனே!!!
ஆவணி காலாண்டில் மிளகாயோட கால்வாசி,
மார்கழி அரையாண்டில் சுரைக்காயோட அரைவாசி,
சித்திரை முழுவாண்டில் முத்தாளம்மன் தேரிழுத்து,
மும்முரமா படிச்சுமுடிச்சி தேர்வெழுத நினச்சேனே!!!
காலாண்டு அரையாண்டு மதிப்பெண்ண கூட்டிவச்சு,
தேர்ச்சிக்கான விதிமுறைனு சொல்லிப்புட்டா என்னசெய்ய!!!

விடியல்ல எழுந்திருச்சி, விதவிதமா பட்சிபார்த்து,
எனக்கும் எம்பேனாவுக்கும் அரைவயிறு நிரப்பிக்கிட்டு,
கூட்டாளி கடன்கொடுத்த ரெண்டுசொட்டு மையவச்சு,
பத்துப்பக்கம் எழுதுகிற சாமர்த்தியம் எப்பவரும்!!!
– திரும்ப எப்பவரும்???
காத்துக்கிடக்கேன் இப்பவர, தேர்வுக்கான தேதிக்காக…

——– ர.ஐஸ்வர்யா