பாரதியாரின் புதிய ஆத்திசூடி – 5

ஒவ்வொரு வாரமும் இலக்கிய சனி பகுதியில் “பாரதியாரின் புதிய ஆத்திசூடி“ பத்து வரிகளுக்கு சிறப்பான விளக்கம் (ஏழு வரிகளில்) தருகிறார் கோமகன் – bharathiyar puthiya aathichudi 5

ஞமலி போல் வாழேல்

ஞமலி என்பது நன்றியின்
மறுவுரு நாய் என்றேதான்
அறிவீரோ என்றாயினும்
எவரையாவது இயைந்தே
வாழ்வதன் வாழ்க்கையாம்
என உணர்ந்து எவரையும்
சாராதிருத்தல் சிறப்பே

ஞாயிறு போற்று

ஞாயிறு போற்றுதல் நம்
தமிழர் வாழ்வது அடிப்படை
ஞாயிற்றின் ஒளியதுவே
உலகு வாழ் உயிர்களுக்கு
ஆதார சுருதி என அறிந்த
பின் ஞாயிறு போற்றுதல்
சிறப்புதானே

ஞிமறென இன்புறு

ஞிமிறு யாதெனின் தேனீ
என்றே தெளிவு கொள்க
இன்புற்றிருக்கும் தேனீக் கூட்டம்
கடும் உழைப்பின் உயர்வை
சொல்லுமாம் உழைப்பே
என்றும் உயர்வு தானென
உணர்வோமே

ஞெகிழ்வது அருளின்

ஏழைக்கு இரங்குதல் என்ப
உள்ளத்துள் உறைந்திடல்
வேண்டுமென உரைப்பேன்
அவ்வாறான இரக்கமும்
அருளொடு இணைந்தால்
ஆதரவற்றோர் வாழ்வில்
அன்பொளி தானாம்

ஞேயம் காத்தல் செய்

ஞேயம் என்பது சினேகத்து
சீரிய நிலையே சினேகம்
நிலையில் சற்றே பழக
நட்பு மலர்ந்து பின் உயிர்
கலந்த நட்பின் உயர்நிலை
ஞேயம் என்பதால் அதனை
காத்தல் அவசியம் தான் – bharathiyar puthiya aathichudi 5

தன்மை இழவேல்

ப சித்திரு த னித்திரு
வி ழித்திருந்தால் மட்டுமே
பதவி கிட்டுமாம்
தனித் தன்மையுடன்
இருத்தலே தனித்திரு என்றாயின்
அதற்கு இகழ் வருதல்
ஏற்புடையதில்லையன்றோ

தாழ்ந்து நடவேல்

தன் நிலை தாழாமை
அந்நிலை தாழ்ந்தக்கால்
உயிர் வாழாமை மானம்
எனப்படும் என்பதனால்
தன் நிலை தாழ நடத்தல்
ஆன்றோர்க்கு அழகல்ல
வேண்டாவே தாழ்தல்

திருவினை வென்று வாழ்

திருவினை என்பன யாவும்
நல்வினை என்பதாயின்
அவ்வினை வெல்லுதல்
அனைவர்க்கும் ஏற்பே
என்பதோடு வெல்லுதலும்
எளிதாம் என்பதை ஏற்றே
வென்றே வாழ வேண்டுமே

தீயோர்க்கு அஞ்சேல்

தீயோர் நடத்தையதனால்
விளைவதுவே தீவினையே
தன் இறுதி தோல்வியே
என உணர்ந்தே அவரது
செயலுக்கு அஞ்சுதல்தான்
முறையுமன்று முடிவுமன்று
என்பதனை ஏற்போம் நாம்

துன்பம் மறந்திடு

நல்இன்பம் கடுதுன்பமும்
இணைந்தே இவ்வாழ்வாம்
இன்பமெனில் உள்ளத்தில்
களிப்பதும் துன்பமெனில்
மெய் துவண்டு விடுவதும்
இயல்பே எனினும்
துன்பம் மறத்தலே இன்பமாம்

– மா கோமகன்